Իրավունքի զարգացման և պաշտպանության հիմնադրամը «Սի-Փի-Այ» իրավունքների պաշտպանության հայկական կենտրոնի հետ համատեղ իրականացնում է «Դեպի ավելի լավ քրեական և վարչական դատավարություն և կիրարկում» ենթադրամաշնորհային ծրագիրը, որը ֆինանսավորվում է Եվրոպական միության կողմից՝ «Հայաստանում արդարադատության ոլորտի բարեփոխումների մշտադիտարկում» ծրագրի (www.juremonia.am) շրջանակում։
Ծրագրի նպատակ է նպաստել դատաիրավական բարեփոխումների հանրային մշտադիտարկմանը։ Ըստ այդմ, նախատեսվում է կատարել մշտադիտարկման, զեկուցման և ջատագովության գործողություններ։ ԻԶՊՀ-ն և «Սի-Փի-Այ» հայկական կենտրոնը որակական տեսանկյունից կվերլուծեն և կգնահատեն կատարված և դեռևս ընթացիկ բարեփոխումները հետևյալ երեք ոլորտներում՝ խափանման այլընտրանքային միջոցներ, վարչական դատավարություն և դատական ակտերի հարկադիր կատարում։ Վեր կհանվեն օրենսդրության և պրակտիկայի բացերը, կմշակվեն առաջարկություններ։ Մի կողմից շեշտը կդրվի արդեն կատարված բարեփոխման վրա, օրինակ՝ քրեական դատավարության օրենսգրքի, մյուս կողմից՝ Հայաստանի Հանրապետության դատական և իրավական բարեփոխումների 2022-2026 թվականների ռազմավարությամբ նախատեսված օրենսդրության բարելավման գործընթացին մասնակցելու։ Խոսքն այս դեպքում հատկապես «Կատարողական վարույթի մասին» նոր օրենքի մշակման աշխատանքների մասին է։ Մշտադիտարկման արդյունքների վերաբերյալ ծրագրի ավարտին կհրապարակվեն զեկույցներ։