Գործընկերություն հանուն բաց հասարակության նախաձեռնությամբ երեկ Երեւանում տեղի ունեցած «Քաղաքացիական հասարակությունը ՄԱԿ-ի Մարդու իրավունքների խորհրդի 35-րդ շրջանում Հայաստանի Համընդհանուր պարբերական դիտարկմանն ընդառաջ» հանրային քննարկման ժամանակ Գենյա Պետրոսյանն անդրադարձել է թե՛ դատական համակարգում առկա և դեռևս չհասցեագրված խնդիրներին, թե՛ արդեն իսկ կատարվող քայլերին. «Ռազմավարությամբ նախատեսվում են որոշակի գործիքակազմեր, այդ թվում՝ դատավորների բարեվարքության գնահատման առավել արդյունավետ, լիարժեք համակարգ ստեղծելուն միտված, անցումային արդարադատության, հակակոռուպցիոն դատարան ստեղծելու ուղղությամբ։
Խոսելով դատական համակարգում առկա կոռուպցիոն, ներքին և արտաքին ճնշումների, կոռուպցիոն խնդիրներին՝ Պետրոսյանն ասել է․ «Մենք ունենք մի դատական համակարգ, որի նկատմամբ առկա է ծայրահեղ ցածր հանրային վստահություն։ Եվ ես համաձայն եմ մյուս բանախոսի հետ, որ կուտակված համակարգային խնդիրները լուծելու արդյունավետ գործիքը լինելու է վեթինգը։ Թեպետ բոլոր այն բարեփոխումները, որոնք այժմ իրականացման փուլում են, դրական ազդեցություն ունենալու են համակարգի վրա»։
Անդրադառնալով կալանավորման պրակտիկային՝ Պետրոսյանը նշել է, որ այստեղ ևս կա առաջընթաց․ քննարկման է դրվել քրեական դատավարության օրենսգրքի նախագիծը, որով նախատեսվել են նաև խափանման այլընտրանքային միջոցներ․ «Դրանք պետք է նվազեցնեն կալանավորման համատարած պրակտիկան»։
Նա առանձնահատուկ ուշադրություն է հրավիրել արդարադատության մատչելիության և քրեակատարողական հիմնարկներում ու բանակում խաղաղ պայմաններում մահվան դեպքերի քննության խնդրների վրա, ինչպես նաև շեշտել է քաղաքացիական հասարակության կազմակերպությունների հանրային գանգատի ինստիտուտն ընդլայնելու կարևորությունը: