Հարցին, թե ինչու իրավապահները չեն զբաղվում Մարդու իրավունքների պաշտպանի 2013 թ․-ի արտահերթ զեկույցով, Գենյա Պետրոսյանն ասել է․ «Այս խնդիրներին պետք է ավելի համակարգային և հավասարակշռված մոտեցում ցուցաբերել։ Ոչ թե անհատական որոշումներ կայացնել առանձին դատավորների նկատմամբ, որ կարող են լինել կամայական և խնդիրներ առաջացնել նաև մեր ստանձնած միջազգային պարտավորությունների տեսանկյունից, այլ առավել համակարգային, թափանցիկ հավասարակշռված և միջազգային չափանիշներին համապատասխան գործընթաց պետք է նախաձեռնվի։ Դա վեթինգն է, որի միջոցով պետք է կատարվի ամբողջ դատական համակարգի վերագնահատումը»։
Ներկայացնելով ԻԶՊՀ դիրքորոշումը այս հարցի վերաբերյալ՝ Պետրոսյանը ասել է, որ վեթինգ հնարավոր է անել նաև գործող Սահմանադրության պայմաններում, և պատմել առաջարկվող մոդելի մասին։ Ըստ իրավաբանի՝ այս գործընթացը պետք է տարածվի ողջ իրավապահ համակարգի վրա։
Արձագանքելով Վենետիկի հանձնաժողով դիմելու վերաբերյալ տարբեր մոտեցումներին՝ Պետրոսյանն ասել է, որ դեմ չէ, որ կարևոր փոփոխություն ենթարկվող նախագծերը համաձայնեցվեն հանձնաժողովի հետ, սակայն այնպես չէ, որ միշտ հաշվի են առնվում այդ առաջարկները․ «Նույն կարգապահական պատասխանատվության մասով մենք ունեցանք փոփոխություններ, որոնք, սակայն, ինչ-որ տեղ նույնիսկ վատթարացրին գործող կարգավորումը, օրինակ՝ արդյունքում հանվեց ակնհայտության չափանիշը՝ որպես կարգապահական պատասխանատվության հիմք, ինչը նույն Վենետիկի հանձնաժողովի կարծիքում արձանագրվել էր որպես բացասական զարգացում»։
Քննարկվել են նաև կարգապահական պատասխանատվությանն առնչվող խնդիրները։ Ըստ Պետրոսյանի՝ առաջին հերթին օրենսդրությամբ պետք է հնարավորինս նախատեսել այն երաշխիքները, որոնք կապահովեն առավելագույն հանրային վերահսկողություն թե՛ կարգապահական պատասխանատվության, թե՛ դատավորների նշանակման, առաջխաղացման գործընթացների նկատմամբ։ Իրավաբանը կարևորել է, որ դատավորների գործունեության գնահատման և որակավորման ստուգման չափանիշները լինեն բավարար հստակեցված, որովհետև, անկախ նրանից, թե ով է քաղաքական իշխանությունը, այս լուծումները պետք է հարատև լինեն և ապահովեն դատավորների ու դատական իշխանության անկախությունը։
Ամփոփելով՝ Գենյա Պետրոսյանը նշել է․ «Վեթինգի գործընթացը մեր պայմաններում անհրաժեշտություն է, քանի որ առաջարկված լուծումները արդյունք կտան երկար տարիներ հետո միայն, իսկ դրա ժամանակը մենք չունենք»։