Գենյա Պետրոսյանը նշել է, որ դատական համակարգում էական առաջընթաց դեռևս չի արձանագրվել, թեպետ ընդունված են բավական առաջադեմ ռազմավարություն և օրենսդրական նախաձեռնություններ«Անգամ հեղափոխությունից հետո դատական համակարգի խնդիրները շարունակում են մնալ արդիական, և էական առաջընթաց դեռևս չի արձանագրվել, թեև արդեն իսկ ընդունված է դատական բարեփոխումների ռազմավարությունը, կան օրենսդրական նախագծեր, որոնք բավական առաջադեմ կարգավորումներ են նախատեսում այս ոլորտում։ Այնուամենայնիվ, այն հիմնական խնդիրների , որ առկա են եղել և նախանշված՝ հանձնարարականում, դեռևս առաջընթաց չկա։ Պետրոսյանն առանձնացրել է դատական համակարգի նկատմամբ հանրության վստահության ցածր մակարդակը, կոռուպցիոն դրսևորումները, ցածր հաշվետվողականությունը»,-ասել է Պետրոսյանը։
Էական խնդիրներից Պետրոսյանն առանձնացրել է ԲԴԽ որոշումների բողոքարկման ենթակա չլինելը և կարգապահական քննությունների դռնփակությունը: Այնուամենայնիվ, Պետրոսյանն այն կարծիքին է, որ զեկույցի առաջարկների կիրարկման փուլում կարձանագրվի դրական փոփոխություն. «Հատկապես մենք փոփոխություն ենք արձանագրելու այս զեկույցի ներկայացման արդյունքում տրված հանձնարարականի իմպլեմենտացիայի փուլում, որովհետև համենայն դեպս այս պահի դրությամբ կարող ենք արձանագրել, որ կա ակնհայտ քաղաքական կամք, և քաղաքացիական հասարակության ներկայացրած համատեղ զեկույցի և այս հանդիպումների մասնակցությունը նպատակ ունի մասնավորապես հստակեցնելու և կոնկրետացնելու այն առաջարկները, որոնք շատ հաճախ չափից դուրս ընդհանրական լինելու պատճառով անգամ հնարավոր չէ իրականացնել և գնահատել դրանց կատարման արդյունքը: Քաղաքացիական հասարակության մասնակցությունը կոնկրետացման և հստակեցման տեսանկյունից և քաղաքական կամքի առկայությունը համակցաբար իրապես կարող են շոշափելի արդյունք բերել այս մեխանիզմի գործարկման առումով»:
