Հարցին, թե ինչպես է մեկնաբանում Սահմանադրական դատարանի որոշումը, ըստ որի՝ հակասահմանադրական է ճանաչվել դատավորին լիազորություններից զրկելու ԲԴԽ իրավունքը, Պետրոսյանը հստակեցրել է, որ ոչ թե իրավունքն է ճանաչվել հակասահմանադրական, այլ կարգապահական պատասխանատվության կամ ավելի ստույգ դատավորի լիազորությունների դադարեցման այն հիմքը, որը տվյալ դեպքում կիրառվել է կոնկրետ դատավորի նկատմամբ․ «Խոսքը էական կարգահական խախտում նախատեսող դրույթի մասին է, որը որպես այդպիսին որակում է դատավորի կատարած այն արարքը, որը անհամատեղելի է դատավորի պաշտոնի հետ»։
Ի պատասխան այն հարցի, թե արդյոք այդ գործիքի միջոցով չպետք է դատական համակարգում մաքրում իրականացվեր, Պետրոսյանը ներկայացրել է ԻԶՊՀ դիրքորոշումը, ըստ որի՝ վեթինգ հնարավոր է իրականացնել անգամ գործող Սահմանադրության պայմաններում․ «Ուղղակի պետք է ընդունվեն այն օրենսդրական ակտերը, չափորոշիչները և ընթացակարգերը, որոնց հիման վրա առանց խտրականության և օբյեկտիվ չափանիշներով հնարավոր կլինի իրականացնել վեթինգ»։
Ըստ Գենյա Պետրոսյանի՝ քննարկվող դրույթը որոշակի չէ, և կարիք կա, որ Դատական օրենսգրքում այն հստակեցվի։ Այնուամենայնիվ, արդյո՞ք սա ՍԴ կողմից հակասահմանադրական ճանաչվելու ենթակա դրույթ է․ «Ամեն օրենսդրական բաց և անորոշություն չէ, որ հանգեցնում է տվյալ դրույթի հակասահմանադրականության։ Անորոշ դրույթը միայն այն դեպքում կարող է ճանաչվել հակասահմանադրական, եթե, ըստ էության, չկա օրենսդրական բացը իրավական պրակտիկայում լրացնելու հնարավորություն, և դրա հետևանքով խախտվում է կոնկրետ անձի իրավունք»։ Շարունակելով՝ Պետրոսյանը կարծիք է հայտնել, որ եթե կոնկրետ դեպքում ԲԴԽ որոշմամբ հստակեցվում էայդ արարքի հասկացությունը, դա կարող է նաև համարվել բավարար տվյալ դրույթի պատշաճ կիրառման համար՝ այսպիսիով անմիջապես Սահմանադրության հետ հակասության խնդիր չառաջացնելով։
Իրավաբանը շեշտել է, որ սա միակ գործիքը չէ․ Դատական օրենսգրքում կան այլ դրույթներ ևս, որոնք համակցությամբ հանգեցնում են էական կարգապահական խախտման։ Խոսելով կարգապահական պատասխանատվության հիմքերի մասին՝ Գենյա Պետրոսյանը նշել է, որ նախագծում ևս դրանք բավարար հստակ չեն։ Նա կարևորել է, որ նախագծում էական կարգապահական խախտման փոխկապակցումը կոնկրետ իրավունքի խախտման հետ շատ էական է, ինչը չկա մեր գործող դատական օրենսգրքում։
Ամփոփելով՝ Պետրոսյանը նշել է, որ դատական համակարգի բարեփոխումները շատ դանդաղ են ընթանում։
