Կոռուպցիայի դեմ պայքարի միջազգային օրը մեր հիմնադրամի ներկայացուցիչ Դավիթ Գյուրջյանը մասնակցել է Մեդիա կենտրոնի կազմակերպած քննարկմանը «Հակակոռուպցիոն դատարաններ. ի՞նչ կփոխվի կոռուպցիայի դեմ պայքարում» թեմայով։
Գյուրջյանը նշել է, որ ցանկացած լավ նախաձեռնություն կարող է տապալվել՝ հաշվի առնելով այն, որ դատական համակարգի խնդիրներն այդպես էլ չեն լուծվել։ «Հատկապես պետք է հաշվի առնել այն հանգամանքը, որ նոր դատարանից կան նոր սպասելիքներ հատկապես հասարակական այնպիսի նշանակություն ունեցող գործերով, ինչպիսիք են կոռուպցիոն բնույթի գործերը»:
Գյուրջյանը ուշադրություն է հրավիրել այն հանգամանքի վրա, որ անգամ լավագույն համակարգերի դեպքում, երբ նախաքննությունը հավուր պատշաճի է իրականացվում, արդարացման ակտերի թիվը բավական մեծ է։ «Եթե մենք ունենք ոչ պատշաճ նախաքննություն և բազմաթիվ խախտումներով քննված գործը գալու է դատարան, օբյեկտիվորեն պետք է ենթադրենք, որ արդարացման ակտերի թիվը ևս կարող է մեծ լինել։ Սա արդեն չի արդարացնի հանրության սպասումները, և հիասթափություն կառաջանա այս նոր դատարանի հանդեպ։ Գյուրջյանի կարծիքով՝ նախընտրելի տարբերակ կլիներ, որ ստեղծվեր ոչ թե նոր դատարան, այլ մասնագիտացված դատավորներ գործեին քրեական ընդհանուր իրավասության կամ վերաքննիչ քրեական դատարանում։ Բացի դրանից՝ մասնագիտացված դատարան տարանջատումը ևս ձևական է՝ հաշվի առնելով այն, որ նույն քրեական օրենսդրությունն է։
Մյուս հարցը, որը կարևոր է բանախոսը, հավակնորդների ընտրության թափանցիկությունն է․ «Նույնիսկ ներկայիս կարգավորումներով հավակնորդների ընտրության թափանցիկությունը պետք է բարձրացվի՝ թե՛ գրավոր, թե՛ բանավոր։ Ողջունելի է, որ փորձագետները իրենց խորհրդատվական եզրակացությամբ պետք է մասնակցեն ընտրության, սակայն ըստ գործող նախագծի դա պարտադիր պայման չէ։ Մեր կարծիքով՝ ցանկալի է, որ ներառվեն միջազգային կամ միջազգային կազմակերպությունների կողմից առաջադրված փորձագետներ»։