Ծրագրի փորձագետները ուսումնասիրել են ոչ միայն «Տեղեկատվության ազատության մասին» ՀՀ օրենքը, այլև այն հարակից ոլորտները և իրավական ակտերը, որոնցում տեղեկատվության մատչելիության հարցն առանցքային դեր ունի։ Խոսքը հատկապես վերաբերում է պետական և ծառայողական գաղտնիքի, օպերատիվ-հետախուզական գործունեության, արխիվային բնագավառներին, քրեական դատավարության, անձնական տվյալների պաշտպանության, գնումների, հանրային ծառայության ոլորտներին:
Ծրագիրն իրականացվել է «Բաց հասարակության հիմնադրամներ-Հայաստան»-ի աջակցությամբ։ Հիմնադրամի քաղաքացիական հասարակություն ծրագրի պատասխանատու Տաթևիկ Խաչատրյանը մատնանշեց ոլորտի կարևորությունը՝ նկատի ունենալով թե՛ տեղական, թե՛ համաշխարհային համատեքստը․ «Ընդհանրապես կա մի սկզբունք, որ ինչքան պետությունը հակված է ավտորիտար կառավարման, այնքան տեղեկատվության ազատության և պետական գաղտնիքի միջև գծվող սահմանը մոտենում է պետական գաղտնիքին։ Եվ ճիշտ հակառակը՝ ինչքան պետությունը դառնում է թափանցիկ, ժողովրդավար և հաշվետու կառավարում է ունենում, այնքան տեղեկատվության մատչելիության սահմանն է լայնանում»։ Ըստ այդմ, մասնագիտական անկախ հետազոտության կարիք առաջացավ, որը թույլ կտար հասկանել, թե ինչ խնդիրներ կան ՀՀ օրենսդրության և պրակտիկայի մեջ, որոնք անհրաժեշտ է շտկել, հաղթահարել և վերանայել Հայաստանի ժողովրդավարացման գործընթացին զուգընթաց։
Քննարկման ընթացքում Գենյա Պետրոսյանը ներկայացրեց «Տեղեկատվության ազատության մասին» օրենքի հիմնական բացերն ու առաջարկվող լուծումները` անդրադառնալով տեղեկատվություն տնօրինողների շրջանակի մեծացմանը, տեղեկատվության տրամադրման ժամկետներին, այն վճարովի տրամադրելուն, արտադատական մարմին ստեղծելու անհրաժեշտությանը, պատասխանատվության միջոցներին, հաշմանդամություն ունեցող անձանց համար տեղեկությունները հասանելու դարձնելուն և այլ խնդիրների։
Փորձագետներից Երանուհի Թումանյանցն անդրադարձել է անձնական տվյալների պաշտպանության և գնումների գործընթացի ոլորտներում տեղեկատվության ազատության հարցերին, ինչպես նաև արտակարգ դրության պայմաններում տեղեկատվության ազատության սահմանափակման խնդրին։
Տեղեկատվության մատչելիության հարցերի մասին պետական գաղտնիքի պաշտպանության ոլորտում խոսել է հիմնադրամի ներկայացուցիչ Դավիթ Գյուրջյանը։
