Սույն քաղաքականության համառոտագրի նպատակն է վեր հանել հիմնականում վարչական դատավարության օրենսդրության բնագավառում առկա խնդիրները՝ շեշտադրելով հատկապես նորմատիվ իրավական ակտերի վիճարկման վարույթին առնչվող կարգավորումները: Փաստաթուղթը մշակվել է գործող օրենսդրության վերլուծության հիման վրա՝ հաշվի առնելով ձևավորված դատական պրակտիկան, վերաբերելի համեմատական փորձը և միջազգային չափանիշները։
Ուսումնասիրության ընթացքում հաշվի են առնվել նաև առանձին փաստաբանների և հասարակական կազմակերպությունների ներկայացուցիչների հետ անցկացված հարցազրույցների արդյունքները՝ գործնական բնույթի հիմնահարցերը վեր հանելու և ոլորտին առնչվող խնդիրների շուրջ վերջիններիս գնահատականները արձանագրելու նպատակով։
Փաստաթուղթն անդրադառնում է նաև դատական ակտերի հարկադիր կատարման բնագավառում արձանագրված մի քանի հիմնախնդիրներին, որոնց կարգավորումը էական նշանակություն կունենա կատարողական վարույթի արդյունավետությունը բարձրացնելու և խոցելի խմբերի համար համապատասխան երաշխիքների ապահովման տեսանկյունից։ Փաստաթուղթը բացահայտված բոլոր խնդիրների կապակցությամբ ներկայացնում է հասցեական լուծումներ, որոնք օգտակար կլինեն իրավասու մարմինների համար՝ անհրաժեշտ օրենսդրական փոփոխությունների և լրացումների նախագծերի մշակման համար։
Բացահայտված խնդիրների հետևողական հասցեագրումը իրավասու պետական մարմինների կողմից էական նշանակություն կունենա առաջին հերթին ՀՀ Սահմանադրությամբ և Մարդու իրավունքների եվրոպական կոնվենցիայով երաշխավորված՝ անձի արդար դատաքննության իրավունքի խախտումները կանխարգելելու, ինչպես նաև դատական և իրավական բարեփոխումների 2022-2026 թվականների ռազմավարության և դրանից բխող գործողությունների ծրագրի կատարման արդյունավետությունը բարձրացնելու համար։
Փաստաթուղթն ընթերցելու համար սեղմեք ՆԵՐԲԵՌՆԵԼ կոճակը։
*****
Սույն հրապարակումը պատրաստվել է Եվրոպական միության ֆինանսական աջակցությամբ ընթացող «Հայաստանում արդարադատության ոլորտի բարեփոխումների մշտադիտարկում» (#Juremonia #Ջուրեմոնիա, www.juremonia.am) ծրագրի ենթադրամաշնորհի շրջանակում: Բովանդակության համար պատասխանատվություն է կրում Իրավունքի զարգացման և պաշտպանության հիմնադրամը, և պարտադիր չէ, որ այն արտահայտի Եվրոպական միության տեսակետները:
